الجمعة، 7 سبتمبر، 2007

قرأت لكم ....


السلام عليكم ورحمة الله وبركاته

مع ان البوست اللي تحت جديد شوية

مش جديد اوي يعني :D:D:D

بس شوفت لكوا بوست جميل جدن

في مدونة جميله

جدن :D

الموضوع بيتكلم عن

اولياء الله الصالحين


المدونة اهي

Closed Eyes

مستنيه رأيكم

هنا

وهناااك

:D

الاثنين، 27 أغسطس، 2007

يوم من عمري :)


معلش بوست طويل كالعاده

بعد فترة غياب طويييله :D

انا بحكي بالتفصيل شويه بس اليوم فعلا لذيذ لازم يتحكي كداا

==========


اتصلت خالتي بينا وقالت لنا ان بنتها - بنت خالتي - واختها وصاحبتها جايين هنا القاهرة بكرة

وبعدين عايزين يروحوا جامعه عين شمس يسألوا علي الماجيستير هنا عشان اللي عندهم هناك زاد سنة

المهم

اتفقنا معاهم وكدا

وبعدين تاني يوم الصبح بقي :) روحنا انا واختي عشان نقابلهم همه جايين من البلد اللي هيا الشرقي

ه -يعني احسن نااااس ههههههههه- المهم اتفقنا اننا هنقابلهم عند مستشفي العباسية :D

ايوة هيا بتاعه المجانيين

المشكله انهم اللي جايين من بعيد جدا وصلوا قبلينا

واحنا كنا لسه ف المترو :S

قلنا لهم نص ساعه وجايين ,

وقفنا تاكسي وقلنا له عايزين مستشفي العباسية لو سمحت

قالنا انهي مستشفي بالظبط

العباسية فيها مستشفيات كتير الزهراء , وعين شمس التخصصي ,ومش عارفه ايه تاني

عايزين انهي واحده - كل دا احنا كنا ركبنا وهوه بيكلمنا- فضلنا ماشييين كتير وعدينا علي جامعه عين شمس ف الطريق وبعدين

قلنا له هوه جمب المستشفي في ميدان وفي كوبري :D همه قالوا لنا انهم هناك ,

المهم فضل ماشي بعد الجامعه شويه وبعدين قال لنا دا الميدان وفي كباري كتير اهو اعدنا نبص سنة مش لاقيين حد

قلنا له طيب فين المستشفي ؟!! قالنا همه كذا واحده انتوا عايزين انهي

قلنا له :العباسية

قال لنا: مفيش واحده اسمها العباسية

قلنا له : اللي هيا بتاعه الامراض النفسية والعصبية والعقلية ههههههه

بجد كنت ماسكه نفسي م الضحك بالعافيه قال لنا دي في مشواااار بعيد اوي

قلنا خلاص نروح

قال لنا وهوه خلاص ماسك نفسه م النرفزه

لا انا مش هاروح هناك دي بعيده جدا وهنلف لفه كبيره اوي

شوفي تاكسي تاني

اما سألنا قالوا لنا انها مش بعيده اوي بس هنمشي شويه كتير

واحنا اتأخرنا عليهم جامد

كل ما نسأل حد علي مستشفي العباسية يقول لنا انهي مستشفي

اتاري همه اساسا مش بيقولوا عليها العبسية كدا زيينا

لازم حد يقولها صريحه كدا مستشفي الامراض ال ..... ههههههه

لقينا تاكسي بعد فترة وبعدين لقيناهم وقفين عند السور ههههههه

نزلنا وسلمنا عليهم واعدنا ندور علي تاكسي تاني عشان يودينا جامعه عين سمس

ركبنا وبعد شوية وصلنا

ملحوظه بس (اضف الي معلوماتك)

همه اساسا لما قالوا لنا انهم عايزينا نروح معاهم

دا كان علي اساس اننا عرفين حاجات كتير ف القاهره هنا

والحمد لله اتأكدوا من كدا فعلا هههههههه

روحنا سألنا هناك علي كليه التربية عشان في مكانيين للجامعه

قالوا لنا تؤتؤ

دا كليه التربيه ليها مكان لوحدهاا هههههه

في ميدان روكسي علي حد ذاكرتي :D

المهم ركبنااا تاني ومشينا وصلنا هناك بقي

والموظفين معرفش علي علم بوصولنا ولا ايه

قاموا بالواجب بصراحة وزياده :S

كانوا بيتكلموا بالعافيه , وخلاص يعني زي مايكون هيتخانقوا معاهم

بصراحة انا اتكسفت منهم اوي

يعني اول مرة يجوا يتعاملوا مع الموظفين هنا

والناس بتعاملهم بطريقه وحشه اوي

بس تقريبا دي الطريقه المتبعة لتطفيش الناس

حتي بنت خالتي وصاحبتها قالوا : دا عندنا ف الجامعه بيعاملونا احسن من كدا واحنا مش عاجبنا

استنناهم شوية لحد ما خلصوا الاسئة بتاعتهم وكده

وبعدين قالوا لنا هنروح جاااااامعه القاهرة :D

ركبنا بقي الترام :D:D

حاجة كدا زي المترو بس حجمه صغير وبيمشي وسط الشارع زي القطر

يعني جمع بين كل المميزات هههههه

نزلنا في محطة اسمها غمرة

وبعدين ركبنا المترو

الي ان وصلنا الي الجامعه

دخلنا طبعا وروحنا سألنا وكدا يظهر ان الموظفين اللي ف كليه التربيه بلغوهم

ان سيادتنا هنشرفهم هناك فقاموا بالواجب وزياده برضو

يعني بنت خالتي بتسألها مره وبعدين سألت تاني عشان مش سمعت الموظفه قالت لها

مش انا قلت لك قبل كدا بتسأليني تاني ليه

شرطاا ... المكان اللي الموظفه قالت لها روحيه دا طلع مكان مختلف تماما

واحنا بنسأل علي مكان تاني :S:S:S

(الكلام اللي جاي دا من باب واما بنعمة ربك فحدث :) )

مسجد سيدنا الحسين (مش تصويري طبعاا)


خلصنا ومشينا من باب المترو لحد الباب الرئيسي

عشان نركب ونروح نزووور :):):)

بجد كنت فرحانه اوي وانا رايحة :)

انا مروحتش زورت قبل كدا عند سيدنا الحسين بس روحت عند السيدة زينب

المهم اي تاكسي نقوله سيدنا الحسين ميرضاش

لحد ماقولنا لواحد السيده زينب ووافق

:) بس ودانا ف الاخر لحد سيدنا الحسين

بجد كانت اكتر حاجة مزعلاني اني مش معايا كاميرا

كنت زعلانه جدن اوي خالص

دخلنا صلينا وروحنا زورنا وكدا

وبعدين كانوا بيطلعوا الناس عشان صلاة العصر

بعد ما طلعت سألت صاحبة بنت خالتي: معاكي موبايل بكاميرا؟

قالت لي :ايوة

- امال ساكتة ليه يا بنتي !!

هاتي بسرعه

عبال ما طلعته بقي وفتحت الكاميرا وكدا

والناس عماله تطلع من المقام وكدا

اول ما مسكت الموبايل لقيت باب المقام اتقفل :(:(

صورت فديو للجامع نفسه من جوه وكدا

طبعا حاجة جميله جدا وعريق اوي

شوية ومشينا .

وصورت برضو فديو لواجهه الجامع من بره بس شوية وقال لي الذاكرة امتلأت

روحنا عشان نزور السيده زينب

برضو مفيش تاكسي راي يوقف مش فاهمه في ايه !!

البنت صاحبة بنت خالتي قالت لنا هنمشي شوية صغيرين ونركب من عند الموقف

واحنا اصلا خالصنييييين خالص

مش قادرين نمشي

المهم قلنا لها ماشي

كل دا وهيا اللي بتقول لنا نمشي ازاي واحنا اللي ساكنين هنا ف القاهرة

مش عارفين نروح منين بجد كنت مكسوفه منهم اوي

مشينا كتير جداااااعشان نوصل للموقف دا

وبعدين ركبنا ومشينا

ساعتها كان اذان العصر بيإذن

وصلنا هناك كانوا صلوا تقريبا


مسجد السيدة زينب -برضو مش تصويري


دخلنا زورنا وكدا

ومشينا وروحنا كلنا طبعا :D

وبكدا كانت المشاوير خلصت

عايزين يركبوا همه من عبود عشان يورحوا

ومكناش عارفين كمان عبود دي ف محطة ايه ف المترو :(

المهم عرفنا ف الاخر

ركبنا المترو ووصلوا لغايه مترو المظلات وركبوا ومشيوا

بجد بجد بجد

كان اجمل يوم مر عليا دا اولا

وكنت فرحانه اني روحت زورت

واني شوفتهم واتعرفت علي اميرة اللي هيا صاحبة بنت خالتي بنت عسل بجد

حسيت اني جمعت الخروجات كلها في يوم واحد وروحتها كلها :(

كان يوم جميل مع اننا كلنا كنا هلكانيين مووت

طبعا في ناس مش مقتنعيين اننا نزور وكدا

بصراحة مش بقيت احب اتناقش في الموضوع دا كتير

وبعدين في خلاف بين العلماء في الموضوع دا

هختم بس بالجمله دي

اميرة كانت عماله تقول : من خرج من داره يتقل مقداره

ههههههههه

بسس

الأربعاء، 1 أغسطس، 2007

كل القواعد .....شواذ

دي اول مرة اكتب فيها والناس تقرأ اللي انا بكتبه

مش عايزين تريقه بقي ... عشان الردود متتحذفش:D:D :D
وبعدين انا قلت اكتب مرة كدا باللغة العربية الفصحي
ومعلشش الموضوع طويل شوية .. اللي مستعجل يقرأ براحة :)
ومحتاجة رأيكوا :)







السلام عليكم ورحمة الله وبركاته

ها انا اكتب من جديد ... مرت فترة كبيرة لم اخط بهذا القلم في هذه الاوراق ...افكار كثيرة تتحرك في خيالي ..كتحرك الامواج في البحار ..

* لطالما فكرت كثيرا في تلك الجملة التي اعتدت علي استخدامها كثيرا ً "لكل قاعده شواذ " عندما نجد شيئاً قد اختلف فيه قاعده ما تتذكر "لكل قاعده شواذ" ولكن ماهو رد الفعل عندما تعلن ثورتك واعتراضك علي تلك القوانين ..ليست كل القوانين بالطبع ولكن..بعض القوانين التي لم تنطبق علي ما يحدث في زماننا هذا ..هذا الزمن الذي تحدث فيه اشياءً غريبة ..دعونا الآن من الحديث عن هذا الزمن وما يحدث فيه من تقلبات ..ودعوني افتح هذه الابواب ..ابواب افكاري ..كل باب به افكار كثيرة في موضوع ما ..هاهو باب يطل علي افكار متضاربة لم اجد لها تفسير ...دعونا ندخل ...ولنر ما بالداخل ... (بداخل رأسي)




*اول موقف ..سأستخلص منه فكرة جديدة مختلفة عما كنت اعتقد (او كما تعتقدون ايضاً ) ..صديقة لي ولنقل انها زميله ..عندما رأيتها ..شعرت براحة نحوها :) وشعرت ايضاً انها تشبهني في كثير من الصفات ..حقيقة لم اجد سبباً مقنعاً يجعلني اعرف ماسبب راحتي إليها .. ولنقل انه كان في اول الامر اعتقاد اننا قد نكون شخصاً واحده او شخصين متشابهين كثيراً ..ولم اشأ ولم استطيع ان اقول لها عما شعرت به ..ولكنني وجدتها تقول لي ما كنت اود قوله :) .. يا....(زهراء).... انا اشعر بالرحة معكي ولا اعرف ما السبب :) فقلت لها ان هذا هوا شعوري ايضاً ...الغريب في هذا الامر انني عندما تعرفت عليها اكثر واقتربت منها فوجئت اننا مختلفين تماماً حتي انني حاولت ان ابحث عن اشياء نتشابه فيها فلم اجد والغريب ان هذا الامر تكرر معي عدة مرات




كنت دائما اؤمن بالحكمة (او المثل )الذي يقول ان "الطيور علي اشكالها تقع " ولكن في هذه المواقف لم اجد لها تفسير وهذا ما جعلني افكر في عنوان هذا الموضوع " كل القواعد ... شواذ " نعم كل القواعد ماهي الا شواذ مرت بمن وضع هذه القاعده وتكررت معه كثيراً فاعتبرها قاعده


* فلقد قرأت شعراً ذات مرة فيه يقول الشاعر :

أحسن إلى الناس تستعبد قلوبهم & فطالما استعبد الإنسان إحسان

وإن أساء مسيء فليكن لك في & عروض زلته صفح وغفران


هذه بيتين من قصيده جميله جدا هذا الكلام جعلني افكر فيه كثيراً

كم من المرات احسنت الي الناس وبادلوا هذا الاحسان بالإساءة ؟ وكم من المرات احسنت إليهم واحسنوا؟
فلقد قال الرسول صلي الله عليه وسلم : "لا تكونوا إمعة تقولون إن أحسن الناس أحسنا وإن أساءوا أسأنا، ولكن وطنوا أنفسكم إن أحسنوا أن تحسنوا وإن أساءوا فلا تظلموا" لا اقصد ان نسيء الي الناس ولكن ... فقط اتسأل الكفة الراجحة ستكون لمن عندما نحسن للناس ؟ بالطبع تعرفون الاجابة وهي ان الناس اصبحوا يعاملوا الاحسان بالإساءة حتي إنهم عندما يطلقون علي شخص كلمة " طيب " فهذا معناه "في نظرهم " (انه علي نياته) اي انه يمكن استغلاله فهو بطيبته هذه لا يفهم شيء في هذه الحياة أليس هذا مبرراً اخر لأن اطلق علي هذه المقوله "احسن إلي الناس تستعبد قلوبهم " انها قاعده شاذة ؟
دعونا نقول انها شاذه فقط في زماننا هذا وسوف نتغاضي عن ان السنوات السابقة كان بها اشخاص مثل الذين اتحدث عنهم ...
* تلك المقوله التي نستخدمها كثيرا "اللي تفتكره موسي يطلع فرعون " كم مرة حدثت معك هذه المقوله وكم مرة تعاملت مع اشخاص كنت تظن بهم شراً ووجدت عكس ذلك؟ لقد تعاملت مع اشخاص كثيرون وصادفت هؤلاء الذين قد لا تحبهم وقد لا تحب التعامل معهم - وهذا تشعر به بدون تعاملك معهم- وقد تتجنب الحديث معهم والاحتكاك بهم :( لقد حدث ذلك معي ...وما اصعب ان تكتشف انك ظلمت انسان لم يفعل لك شيء ... فقط خطأه الوحيد انك قد اخذت عنه فكرة خاطئة ...وقد قالت لي صديقتي انني من هؤلاء الذين لا تعرفهم جيدا الا اذا تعاملت معهم :)
هل بعد كل هذا نستطيع ان نقول .... ان" لكل قاعده شواذ" ام ان

" كل القواعد ... شواذ"


بسس :)

الجمعة، 27 يوليو، 2007

في البداية ....

بسم الله الرحمن الرحيم
اللهم صلي علي سيدنا محمد وعلي آله وصحبة وسلم

قررنا نحن (شركة الزهراء) للكتابه في المدونات ..انشاء هذه المدونة (التي تشرفونا فيها الآن)
وذلك في تمام الساعه 4.30فجراً الموافق 24يوليو 2007

:D:D:D اول حاجة خالص عايزة اشكر مسلمة اونلاين جدا جدا جدن

عشان هيا اللي خلتني اعمل المدونة دي لاني كنت متررده جدا
ولكن كلامها جاء في وقت كنت احتاج ان يشجعني احد علي الانشاء

ثانياً بشكرها تاني عشان تعبتها جداا في المدونة
كل شوية ..يا مسلمة هيا كلمة كذا معناها ايه ..طب اعمل فيها ايه
..تقولي استني كدا ..انا كتباها كذا عندي
اعمليها كذا بجد سألتها في كل حاجة تقريبا :$

==================


تالت حاجة


معني اسم المدونة عشان غريب شوية

هيا ليها 3 معاني

اول معني معني مفرح شوية وبيدي امل كدا وشوية تنمية بشرية :D
م
عناه ان كل حاجة ماشية وهتعدي ..هتاخد وقتها وتخلص ..اما تكون عندك مشكله مثلا وانته متأكد انها ليها وقت وهتخلص
..هتبقي مش حامل همها خالص ..يعني عايش حياتك والمشكله مأثرتش فيك ..اكيد هتحاول تحلها طبعا .


.لكن تكون عارف انها زي ما بيقولوا "ماداقت الا لما فورجت "
اول ما تشوف مشكله او تبقي مدايق ..
تعرف علطول انها هتاخد وقتها وتمشي .
.زي السحابة بتمشي بس بتاخد وقت كبير ..
يمكن احنا حتي
ممكن مناخدش بالنا انها بتمشي ..بس لو دققت هتلاقيها (اهي ماشية وبتعدي )

=========
بالنسبة بقي لمعناها التاني هومعني حزايني شويتين تلاته

هوا نفس المعني اللي فوق دا بس لوفكرنا من ناحية حزايني ..
ان برضو لما تكون فرحان الفرحة هتاخد وقتها وتعدي
..برضو مش هتفضل علطول:(

المعني التالت بقي
ا
نها كانت في مسلسل مين اللي ميحبش فاطمة :D في اغنية المقدمة كان بيقول "واهي م ماشية وبتعدي "
بسس


واخييرا ..وليس اخرا

ان شاء الله المدونة تكون كويسه ومعلش اذا كنت كتبت كتير ..هتتعودوا بعد كدا :D