الاثنين، ٢٧ أغسطس ٢٠٠٧

يوم من عمري :)


معلش بوست طويل كالعاده

بعد فترة غياب طويييله :D

انا بحكي بالتفصيل شويه بس اليوم فعلا لذيذ لازم يتحكي كداا

==========


اتصلت خالتي بينا وقالت لنا ان بنتها - بنت خالتي - واختها وصاحبتها جايين هنا القاهرة بكرة

وبعدين عايزين يروحوا جامعه عين شمس يسألوا علي الماجيستير هنا عشان اللي عندهم هناك زاد سنة

المهم

اتفقنا معاهم وكدا

وبعدين تاني يوم الصبح بقي :) روحنا انا واختي عشان نقابلهم همه جايين من البلد اللي هيا الشرقي

ه -يعني احسن نااااس ههههههههه- المهم اتفقنا اننا هنقابلهم عند مستشفي العباسية :D

ايوة هيا بتاعه المجانيين

المشكله انهم اللي جايين من بعيد جدا وصلوا قبلينا

واحنا كنا لسه ف المترو :S

قلنا لهم نص ساعه وجايين ,

وقفنا تاكسي وقلنا له عايزين مستشفي العباسية لو سمحت

قالنا انهي مستشفي بالظبط

العباسية فيها مستشفيات كتير الزهراء , وعين شمس التخصصي ,ومش عارفه ايه تاني

عايزين انهي واحده - كل دا احنا كنا ركبنا وهوه بيكلمنا- فضلنا ماشييين كتير وعدينا علي جامعه عين شمس ف الطريق وبعدين

قلنا له هوه جمب المستشفي في ميدان وفي كوبري :D همه قالوا لنا انهم هناك ,

المهم فضل ماشي بعد الجامعه شويه وبعدين قال لنا دا الميدان وفي كباري كتير اهو اعدنا نبص سنة مش لاقيين حد

قلنا له طيب فين المستشفي ؟!! قالنا همه كذا واحده انتوا عايزين انهي

قلنا له :العباسية

قال لنا: مفيش واحده اسمها العباسية

قلنا له : اللي هيا بتاعه الامراض النفسية والعصبية والعقلية ههههههه

بجد كنت ماسكه نفسي م الضحك بالعافيه قال لنا دي في مشواااار بعيد اوي

قلنا خلاص نروح

قال لنا وهوه خلاص ماسك نفسه م النرفزه

لا انا مش هاروح هناك دي بعيده جدا وهنلف لفه كبيره اوي

شوفي تاكسي تاني

اما سألنا قالوا لنا انها مش بعيده اوي بس هنمشي شويه كتير

واحنا اتأخرنا عليهم جامد

كل ما نسأل حد علي مستشفي العباسية يقول لنا انهي مستشفي

اتاري همه اساسا مش بيقولوا عليها العبسية كدا زيينا

لازم حد يقولها صريحه كدا مستشفي الامراض ال ..... ههههههه

لقينا تاكسي بعد فترة وبعدين لقيناهم وقفين عند السور ههههههه

نزلنا وسلمنا عليهم واعدنا ندور علي تاكسي تاني عشان يودينا جامعه عين سمس

ركبنا وبعد شوية وصلنا

ملحوظه بس (اضف الي معلوماتك)

همه اساسا لما قالوا لنا انهم عايزينا نروح معاهم

دا كان علي اساس اننا عرفين حاجات كتير ف القاهره هنا

والحمد لله اتأكدوا من كدا فعلا هههههههه

روحنا سألنا هناك علي كليه التربية عشان في مكانيين للجامعه

قالوا لنا تؤتؤ

دا كليه التربيه ليها مكان لوحدهاا هههههه

في ميدان روكسي علي حد ذاكرتي :D

المهم ركبنااا تاني ومشينا وصلنا هناك بقي

والموظفين معرفش علي علم بوصولنا ولا ايه

قاموا بالواجب بصراحة وزياده :S

كانوا بيتكلموا بالعافيه , وخلاص يعني زي مايكون هيتخانقوا معاهم

بصراحة انا اتكسفت منهم اوي

يعني اول مرة يجوا يتعاملوا مع الموظفين هنا

والناس بتعاملهم بطريقه وحشه اوي

بس تقريبا دي الطريقه المتبعة لتطفيش الناس

حتي بنت خالتي وصاحبتها قالوا : دا عندنا ف الجامعه بيعاملونا احسن من كدا واحنا مش عاجبنا

استنناهم شوية لحد ما خلصوا الاسئة بتاعتهم وكده

وبعدين قالوا لنا هنروح جاااااامعه القاهرة :D

ركبنا بقي الترام :D:D

حاجة كدا زي المترو بس حجمه صغير وبيمشي وسط الشارع زي القطر

يعني جمع بين كل المميزات هههههه

نزلنا في محطة اسمها غمرة

وبعدين ركبنا المترو

الي ان وصلنا الي الجامعه

دخلنا طبعا وروحنا سألنا وكدا يظهر ان الموظفين اللي ف كليه التربيه بلغوهم

ان سيادتنا هنشرفهم هناك فقاموا بالواجب وزياده برضو

يعني بنت خالتي بتسألها مره وبعدين سألت تاني عشان مش سمعت الموظفه قالت لها

مش انا قلت لك قبل كدا بتسأليني تاني ليه

شرطاا ... المكان اللي الموظفه قالت لها روحيه دا طلع مكان مختلف تماما

واحنا بنسأل علي مكان تاني :S:S:S

(الكلام اللي جاي دا من باب واما بنعمة ربك فحدث :) )

مسجد سيدنا الحسين (مش تصويري طبعاا)


خلصنا ومشينا من باب المترو لحد الباب الرئيسي

عشان نركب ونروح نزووور :):):)

بجد كنت فرحانه اوي وانا رايحة :)

انا مروحتش زورت قبل كدا عند سيدنا الحسين بس روحت عند السيدة زينب

المهم اي تاكسي نقوله سيدنا الحسين ميرضاش

لحد ماقولنا لواحد السيده زينب ووافق

:) بس ودانا ف الاخر لحد سيدنا الحسين

بجد كانت اكتر حاجة مزعلاني اني مش معايا كاميرا

كنت زعلانه جدن اوي خالص

دخلنا صلينا وروحنا زورنا وكدا

وبعدين كانوا بيطلعوا الناس عشان صلاة العصر

بعد ما طلعت سألت صاحبة بنت خالتي: معاكي موبايل بكاميرا؟

قالت لي :ايوة

- امال ساكتة ليه يا بنتي !!

هاتي بسرعه

عبال ما طلعته بقي وفتحت الكاميرا وكدا

والناس عماله تطلع من المقام وكدا

اول ما مسكت الموبايل لقيت باب المقام اتقفل :(:(

صورت فديو للجامع نفسه من جوه وكدا

طبعا حاجة جميله جدا وعريق اوي

شوية ومشينا .

وصورت برضو فديو لواجهه الجامع من بره بس شوية وقال لي الذاكرة امتلأت

روحنا عشان نزور السيده زينب

برضو مفيش تاكسي راي يوقف مش فاهمه في ايه !!

البنت صاحبة بنت خالتي قالت لنا هنمشي شوية صغيرين ونركب من عند الموقف

واحنا اصلا خالصنييييين خالص

مش قادرين نمشي

المهم قلنا لها ماشي

كل دا وهيا اللي بتقول لنا نمشي ازاي واحنا اللي ساكنين هنا ف القاهرة

مش عارفين نروح منين بجد كنت مكسوفه منهم اوي

مشينا كتير جداااااعشان نوصل للموقف دا

وبعدين ركبنا ومشينا

ساعتها كان اذان العصر بيإذن

وصلنا هناك كانوا صلوا تقريبا


مسجد السيدة زينب -برضو مش تصويري


دخلنا زورنا وكدا

ومشينا وروحنا كلنا طبعا :D

وبكدا كانت المشاوير خلصت

عايزين يركبوا همه من عبود عشان يورحوا

ومكناش عارفين كمان عبود دي ف محطة ايه ف المترو :(

المهم عرفنا ف الاخر

ركبنا المترو ووصلوا لغايه مترو المظلات وركبوا ومشيوا

بجد بجد بجد

كان اجمل يوم مر عليا دا اولا

وكنت فرحانه اني روحت زورت

واني شوفتهم واتعرفت علي اميرة اللي هيا صاحبة بنت خالتي بنت عسل بجد

حسيت اني جمعت الخروجات كلها في يوم واحد وروحتها كلها :(

كان يوم جميل مع اننا كلنا كنا هلكانيين مووت

طبعا في ناس مش مقتنعيين اننا نزور وكدا

بصراحة مش بقيت احب اتناقش في الموضوع دا كتير

وبعدين في خلاف بين العلماء في الموضوع دا

هختم بس بالجمله دي

اميرة كانت عماله تقول : من خرج من داره يتقل مقداره

ههههههههه

بسس

هناك ٢٥ تعليقًا:

§a§a يقول...

انا كتبت تعليق كيبر عريض وفى الاخر لقيته مش نزل يلا معلش

بجد جميل جدا البوست واجمل حاجه انهم استعانو بيكم وانتو مش عارفين الاماكن

المرة الجايه ان شاء الله يكون فى كام عشان تصورى كل شىء

انا نفسى ازور الاماكن دى تانى اخر مرة كانت من سنتين سنه رابعه كليه كانت رحله الى الاماكن الاثريه

القاهرة الفاطميه والحسين وخان الخلي والازهر ومسجد الحاكم بامر الله الفاكمى وجامع الاقمر واسوار القاهرة ياااااااااااااا

ايام جميله ياريت تتعوض تانى

اسكندراني اوي يقول...

.m.alexهو يوم من العمر فعلا
عشان تعملو كل الحاجات دي في يوم واحد
بجد مشكله
دا مقابله موظفين الحكومه لوحدها فعلا عاوزه يجي ميت بوسه
ههههههههههههههههههههههههه


اما زياره ال البيت
فدا شيئ ما يزعلش بل بالعكس
احنا بنجلهم ونحترمهم احترامنا للسول الكريم

يلا حمدا لله على سلامتكم


دوختينا معاكي رايحه جايه جايه رايحه
هههههههههههههههههههههههه

تحياتي

klmat يقول...

ده مشوار طويل اوى
انا بنهج وانا بكتب التعليق
بس عارفه لوكنتم عارفيين السكه
ماكنش حايكون له التأثبر ده
الحمدلله انكم وصلتم بالسلامه
وشوفتى خالتك واتعرفتى على شخصيه
ظريفه وزرتى اهل الرسول عليه
الصلاه والسلام
اسلوبك لذيذ
واشكرك على زيارتك لمدونتى
تحياتى لك

الزهراء يقول...

§a§a
--------
يلا حصل خير قدر الله وماشاء فعل

اكيد الرد كان مختلف شوية عن الرد دا

وبتكتب وانته مداااايق هههههه

جربت انا الموضوع دا كتير وف الساحة كمان :D:D:D

------
دي اصعب حاجة مش اجملها
والله كنت زعلانه بجد اوي :(((
يلا حصل خيير :)
---
يااااارب :)))

نفسي انا كمان اروح كل دااا بجد

الايام مش هترجع اكيد

بس ممكن انته تحاول تعوضها من جديد

فاهمني ؟؟

الزهراء يقول...

اسكندراني
----------
الحمد لله كدا مش عليا ربع جنيه مخروم ولا حاجة :D:D

فعلا اليوم كان طويييييييييل اوي
ومتعب جدن انا مكنتش عارفه اقف من كتر التعب
بس برضو كان يوم لذيذ :))

هههههه

هوا فعلا لازم تعاملهم كويس اوي عشان يرضو عننا

والله وصلت للكشك كمان
برضو البنت كلمتهم وحش اوي :((

حضرتك بتقول مش مشكله خالص ومتفهم الموضوع اهو
في عاااالم تانيه تقولك دا شرك وبتاع وطواف بالقبور وكلام كدا:(((((((((

ربنا يهدينا ويهديهم

الله يسلمك

معلش بقي

اهي اخر خروجة تقريبا فلازم تبقي كدا

السنة الجايه بقي بوست زي دا :D:D

منور يا فندم :)

الزهراء يقول...

كلمااات
----------
هوا فعلا مشوار طويل بس والله بجد لو كنتي موجوده كنتي هتبقي فرحانه اوي

ودا من اجمل الاحساسات - جمع احساس -اللي الواحد ممكن يحس بيها انه يبقي تعبان بس سعيد

زي ما يكون بيشتغل شغل بيحبه اوي وتعبان بس فرحان انه بيعمله :)

----
بعد الشر عليكي :)))
بس ياريت اكون عرفت اوصل ليكوا اليوم بجد

الله يسلمك
لا هيا خالتي مجتش معاهم :) بنتها وبنتها وصحبتهم بس

ووالله احلي حاجة فاليوم اني زرت
يارب يبقي ديما
قولوا اميين
ربنا يكرمك :)
بعض ماعندكم يافندم
لا شكر علي واجب :))))
يارب تيجي تنوري ديمااا
تحياتي انا علي الرد الجميل دا
بس ايه اللي مصحيكي بدري كدا؟؟!!
ولا دي عاده؟ :)
=========
معلش لو قريتي الرد كدا لوحده هتحسي انه ملوش دعوه بعضه
هوه رد علي كل كلامك فا اقريهم مع بعض

بسس

Arabic ID يقول...

نصيحة بقى جامدة وهتدعيلى بجد

أنا روحت الحسين والسيدة زينب والسيدة نفيسة

ولكن لما دخلت الأزهر

كان موضوع تانى خالص


نصيحتى ليكى ولكل الناس روحى زورى الجامع الأزهر ومش هتندمى ، بس ما يكونش وقت صلاة الجمعة

والسلام

الزهراء يقول...

اول حاجة حضرتك منور البلوج :)

ان شاء الله متكونش اخر زيارة

انا بفرح اما بلاقي ردود كدا جت من ناس معرفهومش :D:D:D

ان شاء الله اول خروجه تاني ابقي اروح

بس الفكره في اني اروح عند آل البيت اننا بنزور آل بيت الرسول صلي الله عليه وسلم

بس

وانشاء الله احاول اروح هناك :)

وعليكم السلام ورحمة الله وبركاته

احساس لسه حى يقول...

عزيزتى
طبعا يوم مش زى اى يوم
ساعات بنعيش يوم بنعمل فيه حاجات كتير
واليوم ده صعب يتكرر مش بيكرر اى قليل اوى واليوم ده كده
بس هقلك على موضوع الموظفين
فرق المعامله لفرق المحافظه اصل كل محافظه ليها ضغطها والقاهر مطحنه بجد
والبلد ناسها مش مستحمله اى شئ
انتى بقه غاويه تصوير
تبقى تفرجينا بقه نقول رائينا
اتمناك ايام كتير مليانه كده حاجات حلوه وزيارات كتيرة
تحخياتى
سلام

mimi يقول...

بصي يا سكر
اولا حمدا لله على سلامتكم
ثانيا انالو بعد الشر من سكان القاهرة مكنتش هعرف حاجة زيكم لاني مكنتش هحب اخرج في الزحمة دي
ثالثا ايه حكاية وكده هي دي لازمة عندك في الكلام ولا في الكتابة بس
تحياتي

7afedat el-zobair يقول...

انتى لفيتى مصر كلها ولا ايه؟

:D

بس كويس ان اليوم ختم بالأنوار دى
عشان يبقى ختامها مسك
بتهيألى تعب اليوم راح اول ما دخلتى على السيده زينب وسيدنا الحسين
الواحد هناك بينسى نفسه اصلاً
يا بختك يا ستى
:P
وبالنسبه للمعامله فى شئون الكليات
فده الطبيعى فى اى كليه
دايما مش طايقين نفسهم وهم بيكلموا
ربنا يهدى
:)

catroz يقول...

الزهراء
ايه ده بس
طيب كنتى تقوليلى
كنت هقولك كل حاجه
دنا بقالى فى الجامعه كى كتير اوى يعنى
:D

امهند انتى اترقيتى على جامعتى و انا مسمحلكيش بكده
اما اشوفك بس هعضك ولا هضربك و لا اى بتاع و خلاص

المهم ان اليوم نهايته جميييييييييله اوى بجد

امتى بقى كل الطلبه يشتغل
:D

§a§a يقول...

فاهم طبعا

اكيد طبعا هحاول تتعوض تانى


بس المشكله الصحبه اللى مش هتتعوض للاسف لان الكل بعد انتهاء الدارسه فى مكان عن التانى

hasomi يقول...

مبروك على المدونة ..

متأخرة جدااا

بس العذر و السماح ...:)

هو كان يوم حضرتك حافل ..

بس انا حاسس ان معجزة حصلت ..

مش ملاحظة انك رحتى لجامعتين و لقيتى فيهم موظفين ..

و حضرتك زعلانة انهم بيردوا بضيق ..

دا كويس انهم كانوا موجودين اساسن ..

ربنا يعينهم ..

:D

....سمسمه يقول...

تصدقي انا دخت على السيرة

:d

وكانى انا اللى دوخت الدوخة دي

انتى فكرتينى بنفسي
لو خرجت برة ميدان الجيزة اقول يا غربتى :d

ماليش انا في المشاوير البعيدة دي

يوم جميل فعلا

شكلك نمتى بعده اسبوع هههههه

الزهراء يقول...

باك

بااااك

بااااااااااااك

:))))

-------------
احساس لسه حي
==============
اهلا اهلا بحضرتك

فعلا اليوم دا مش بيتكرر الا كل كام سنة كدا :))

وفعلا القاهرة مطحنة زي ما بتقول
بس مش معني كدا انهم يعاملوهم بالطريقه دي

صح ولا ايه ؟ :)

انا بحب التصوير ايوة

بس المشكله مش عندي كاميرا ديجيتال
والكاميرا العاديه هتبقي مشكله عشان اصور واحمض وادخلها بأسكانر هتاخد عمر طويل

والله لولا كدا كان زمان المدونة غرقااانه صور :(((

يلا خيير

ان شاء الله قريبا :))

ياريت متكونش اخر زيارة يا فندم :))

الزهراء يقول...

mimi
========
الله يسلمك يا جميل

انا ساعات والله بتمر عليا اوقات بكون نفسي ابقي ساكنة مش هنا ...بعييد عن الزحمة دي والاصوات اللي خرمت ودااني :D

بالنسبة بقي لكلمة وكدا :D

عادي هيا ساعات بتمسكني تلاقيني بقولها كتير وكدا هههههه

انتي وحظك بقي بمسكتي امتي
وانا بكتب يا اما وانا بتكلم
فا مش ديما

واحيانا مش بقولها خالص :))

وكدا :D:D:D

الزهراء يقول...

حبي حفيده الزبير
-----------------
انا فعلا لفيت مصر كلها
وركبت كل حاجه

كان يوووم ,بفتكره دلوقتي عامل زي الحلم كدا :))

انا مكنتش مسدقه نفسي وانا رايحة ازور واكيد التعب راح وكل حاجة طارت من دماااغي خالص :D

مدااااااااد :)

والحمد لله انه ختامه مسك

ربنا يهدي الموظفين دول فعلا
اصل المشكله ان دا شغلهم ..وتلاقيهم مش طايقين يعملوه امال جم ليه اصلا :S:S

منورة يا حبىىى

الزهراء يقول...

كاتروووزة
-----------

منور يا جميل

والله كنت ناويه اكلمك
قلت اي حاجة منعرفهاش معايا تليفون روز هكلمها فورن
بس اديكي شوفتي اهو
عرفنا كل حااااجة هههههه


لا بجد

هيا المشكله ان كله جه ورا بعضه اما وصلنا الجامعه قالوا مش هنا روحنا برسعه علي كليه تربيه ومنها روحنا جامعه القاهره وهكذا بس :)


بس ايه اللي جاب كل الطلبه ف الموضوع دلوقتي عايزة افهم :P:P

الزهراء يقول...

صاصا
----
ايوة صح

هيا كتير مش بتتعوض تاني

خيير ان شاء الله

منور المدونة :))
==================================
حاسومي
------
والله بجد بجد سعدت برد حضرتك جداااااا

يعني كنت بقول اكيد دكتور حاسومي ودكتور حمزة جم هنا بس ليه مش ردوا

اكيد المدونة مش عجباهم او البوستات
في حاجة غلط

بس فعلا حضرتك اسعدتني بالرد دا

الله يبارك في حضرتك :)

ان شاء الله يحصل لكم يوم زي دا كلكوااا

بجد يوم جميل مهما كان مليان تعب :)
---------------

هوا كمان كان ممكن منلاقيش موظفين !!!

همه بيروحوا فين عايزة افهم
مش دا شغلهم برضو ولا بيجواكدا سبيل ؟!!

ربنا يعنا احنا و....يهديهم

ياريت تكرر الزياره تاني يا فندم :))

الزهراء يقول...

سمسمة
======
الف سلامة عليكي من الدوخة يا بنتي

احنا مدوخناش علي فكره

مكنواش قادرين نقف علي رجلينا بس

تخيلي بنت خالتي كانت بتقولي : انتي اعدتي في لمترو قبل كدا ؟!!

من كتر ما ركبناه وملقيناش مكان نتنفس :D

احلي يوم بجد :P

احنا نمنا كتير فعلا :))

وكلنا انا حسيت اني منمتش من عشر ايام :D:D:D
======

منورة يا فندم المدونة

Closed Eyes يقول...

كوباية مية بسرعه


واحد ايموشن دايخ على الاخر


شكرا اختى على البوست الجميل دا



وان شاء الله تتعوض واحسن كمان

وتاخدى كاميرا كمان :)

The Manager يقول...

اسف على التأخير فى الرد

هو الحكاية دي بتحصل معايا كتير

ناس تعتمد عليا ويفتكروا اني هقدر اخدمهم ومحدش يقدر يخدمهم زيي

واطلع مش عارف حاجة خالص

اهم حاجة فى الموضوع دة انكوا مش تقولوا انكوا عارفين وانتوا تكونوا مش كدة

وزي ما شفت انتوا استفادتوا كتير من اليوم الجميل دة

طبعا كان نفسي ابقى معاكم بس الظروف

وإن شاء الله اجي المرة الجاية :)

تحياتى ليكي يا زهراء :)

محمد الشوادفي يقول...

أهي ماشية وبتعدي دي مدونتى ، بس كمنك عاملاها من قبلي فهسامح المرادي :)

تقبلي مروري

هبة يقول...

موضوع جميل اوي يا زهراء
فعلا يوم متعب شوية بس ممتع
والواحد فعلا نفسه يزور الاماكن دي لانها بتكون من ريحة الرسول عليه الصلاة والسلام وال البيت
ربنا يوفقك